Në çdo debat për mirëqenien në vendin e punës, dëgjojmë shpesh për balancën punë jetë, fleksibilitetin, atmosferën pozitive apo zhvillimin profesional. Por përtej të gjitha këtyre, një e vërtetë qëndron mbi çdo teori: nuk ka mirëqenie reale pa siguri financiare.
Në një kohë ku kostot e jetesës rriten më shpejt se pagat, dhe ku stresi ekonomik ndikon drejtpërdrejt në fokusin dhe motivimin e punonjësve, kujdesi për portofolin e tyre është po aq i rëndësishëm sa kujdesi për shëndetin e tyre mendor apo fizik.

Pse paga është pjesë e mirëqenies

Në tregun shqiptar, paga nuk është vetëm një kompensim për punën e kryer por është një shenjë e qartë e vlerësimit dhe respektit profesional.
Kur një punonjës ndien se kontributi i tij shpërblehet drejtësisht, ai jo vetëm që motivohet më shumë, por zhvillon edhe ndjenjën e përkatësisë dhe besimit ndaj kompanisë.

Nga ana tjetër, mungesa e transparencës në pagesa apo ndjesia e pabarazisë mund të krijojnë frustrim, pasiguri dhe demotivim, edhe në kompani me kulturë pozitive.
Kjo është arsyeja pse gjithnjë e më shumë organizata po e vendosin sigurinë financiare si shtyllë të mirëqenies së punonjësve.

Meritokracia dhe performanca si bazë për rritjen e pagës

Një nga mënyrat më efikase për të ndërtuar një sistem të drejtë pagash është lidhja e tyre me performancën.
Rritja e pagës nuk duhet të vijë automatikisht nga koha e kaluar në kompani, por nga vlera reale që punonjësi sjell.

Modelet më efektive që po zbatohen edhe në tregun vendas përfshijnë:

• Rishikim periodik të pagave bazuar në objektiva të matshëm dhe rezultate konkrete.
• Bonuse individuale ose të ekipit, të lidhura me performancën dhe arritjet reale, jo me preferenca personale.
• Transparencë në kriteret e vlerësimit, që secili punonjës të dijë qartë çfarë duhet të arrijë për të avancuar.
• Feedback i rregullt midis punonjësve dhe drejtuesve, për të shmangur ndjesinë e “vlerësimeve subjektive”.

Këto praktika krijojnë një kulturë ku shpërblimi nuk shihet si favor, por si konfirmim i meritës duke kthyer pagën nga faktor stresi, në burim motivimi.

Paga ndihmon mirëqenien mendore

Siguria financiare ndikon drejtpërdrejt në mirëqenien emocionale të njerëzve.
Një punonjës që e di se paga e tij është e drejtë dhe në rritje të qëndrueshme sipas performancës, është më pak i stresuar për të ardhmen dhe më i prirur të investojë në zhvillimin e vet profesional.

Në të kundërt, pasiguria rreth pagës apo mungesa e perspektivës për rritje krijon ankth, ul fokusin dhe dëmton klimën e punës.
Në këtë kuptim, pagesat e drejta nuk janë thjesht çështje ekonomike, por edhe psikologjike. Ato ndikojnë në mënyrën si punonjësit ndihen, mendojnë dhe kontribuojnë çdo ditë.

 Roli i HR në ndërtimin e një sistemi të drejtë shpërblimi

Departamentet e Burimeve Njerëzore kanë sot një mision më të gjerë se menaxhimi i politikave.
Ato janë arkitektët e drejtësisë organizative, dhe mënyra si strukturohen pagat është pasqyra më e qartë e kulturës që kompania përfaqëson.

HR mund të:

• krijojë korniza transparente për politikat e pagave,
• kryejë analiza tregu për të siguruar konkurrueshmëri,
• vendosë mekanizma të qartë meritokracie, dhe
• ndërtojë kulturë komunikimi të hapur, ku paga nuk shihet si temë tabu, por si pjesë e zhvillimit profesional.

 Përtej numrave: paga si pjesë e kulturës së kujdesit

Në fund, kujdesi për punonjësin fillon aty ku ndalet pasiguria e tij ekonomike.
Një pagë e drejtë, e rritur mbi bazën e meritës dhe performancës, nuk është vetëm stimul financiar është një mesazh besimi dhe respekti.

Në një treg ku motivimi shpesh kërkohet në trajnime, aktivitete apo përfitime, ndoshta është koha të kthehemi tek baza:
një sistem pagash që vlerëson, shpërblen dhe krijon siguri.

Sepse mirëqenia e vërtetë fillon nga portofoli, por reflektohet në çdo aspekt të jetës dhe punës së një njeriu.